Mwenyekiti wa Mtaa apigana ngumi na wananchi wake Arusha

Mwenyekiti wa Mtaa wa Mureti, Kata ya Mureti Jijini Arusha, Bw. Dominic Kivuyo, anadaiwa kuhusika katika tukio la kupigana na mwananchi wakati wa msiba. Kwa mujibu wa mashuhuda, Mwenyekiti huyo aliitwa msibani kusuluhisha mgogoro wa kifamilia ulioibuka baada ya kifo cha mwanamume mmoja, ambapo ndugu wa marehemu wanadaiwa kutaka kumnyima haki zake mjane wa marehemu. Wananchi waliodai kujitokeza kumtetea mjane huyo wanasema hawakuridhishwa na namna Mwenyekiti alivyolishughulikia suala hilo, wakimtuhumu kuegemea upande wa wanaodaiwa kumdhulumu mjane. Inadaiwa kuwa hali ilibadilika baada ya mwananchi mmoja kumwambia Mwenyekiti huyo kuwa hawampendi, kauli iliyodaiwa kumkasirisha na kusababisha vurugu na kurushiana ngumi. Tukio hilo lilizua taharuki msibani huku wananchi wakijitahidi kuwatenganisha wawili hao kama inavyoonekana kwenye video iliyosambaa mitandaoni.