ตำรวจหลวงพระบางยึดไอซ์ 521 กิโล ซุกเจ็ทส่วนตัวเตรียมบินข้ามประเทศ | ข่าวประเทศลาว | VaoHaiFung.EP260

ສະກັດໄວ້ທັນ! ເຈົ້າໜ້າທີ່ ປກສ ຫຼວງພະບາງ ຢຶດໄອສ໌ 500 ຫໍ່ ກຽມຂຶ້ນຍົນສ່ວນຕົວຂ້າມປະເທດ ພ້ອມກັກຕົວກຸ່ມຜູ້ກ່ຽວຂ້ອງ 13 ຄົນ. ອີງຕາມການລາຍງານຂອງເຈົ້າໜ້າທີ່ ປກສ ແຂວງຫຼວງພະບາງໄດ້ໃຫ້ຮູ້ວ່າ: ວັນທີ 21 ກັນຍາ 2026 ໄດ້ຮັບຂ່າວຈາກພົນລະເມືອງດີວ່າ ມີກຸ່ມເປົ້າໝາຍຈະມີການຂົນສົ່ງຢາເສບຕິດຂ້າມຜ່ານລະຫວ່າງປະເທດ ໃຊ້ເສັ້ນທາງຂົນສົ່ງທາງອາກາດໂດຍນໍາໃຊ້ຍົນສ່ວນຕົວ ບິນຕົງຈາກສາຍການບິນປະເທດມາເລເຊຍ ມາລົງສະໜາມບິນສາກົນແຂວງຫຼວງພະບາງ. ວັນທີ 26 ກັນຍາ 2026 ເຫັນວ່າ: ເປົ້າໝາຍມີການປ່ຽນແປງ ຖ້ຽວບິນມາເປັນວັນທີ 1 ຕຸລາ 2026, ກໍານົດຕາຕະລາງເດີນທາງເວລາ 11 ໂມງ 30 ນາທີ ຮອດສະໜາມບິນສາກົນແຂວງຫຼວງພະບາງ ເວລາ 13 ໂມງ 30 ນາທີ, ພາຍຫຼັງໄດ້ຮັບແຫຼ່ງຂ່າວຄືແນວນັ້ນກອງບັນຊາການ ປກສ ແຂວງຫຼວງພະບາງ ໄດ້ຊີ້ນຳໜ່ວຍງານວິຊາສະເພາະຂອງ ປກສ ແຂວງ ຈາກນັ້ນໜ່ວຍງານວິຊາສະເພາະຈຶ່ງໄດ້ຕິດຕາມກວດກາ ພົບພາຫະນະ ( ລົດໃຫຍ່ ) ຈໍານວນ 2 ຄັນ ເຂົ້າມາຈອດຢູ່ຕໍ່ໜ້າສະໜາມບິນ, ຈາກນັ້ນໄດ້ມີພະນັກງານສະໜາມບິນໄດ້ຍູ້ລໍ້ຂົນເຄື່ອງ ອອກຈາກລົດ 2 ຄັນດັ່ງກ່າວ ( ເປັນປະເພດກະເປົາ ) ຈຳນວນ 23 ໜ່ວຍ ເພື່ອເຂົ້າໄປຜ່ານເຄື່ອງເອັກສະເລ ແລ້ວນໍາຂຶ້ນຍົນລໍາດັ່ງກ່າວ, ພາຍຫຼັງເອົາເຄື່ອງອອກຈາກລົດແລ້ວ, ລົດຈໍານວນ 2 ຄັນດັ່ງກ່າວໄດ້ຂັບຂີ່ອອກຈາກສະໜາມບິນທັນທີ່. ຈາກນັ້ນ, ເຈົ້າໜ້າທີ່ຕໍາຫຼວດເຫັນວ່າມີພິລຸດ ຈຶ່ງໄດ້ສະເໜີຂໍກວດກາເບິ່ງທາງໃນຂອງກະເປົາລາກ ຈໍານວນດັ່ງກ່າວ ຈຶ່ງພົບເຫັນຖົງສີຟ້າສັນຍາລັກດ້ວຍຮູບປາຄໍາຄືກັນທັງໝົດ ພ້ອມທັງໄຂເບິ່ງທາງໃນກະເປົາໄດ້ພົບເຫັນກ້ອນສີຂາວຄ້າຍຄືຢາໄອສ໌ ບັນຈຸໃນຖົງສີຟ້າ ຈໍານວນ 21 ໜ່ວຍ, ອີກກະເປົາ 2 ໜ່ວຍ ຜ່ານການກວດກາ ເຫັນວ່າເປັນເຄື່ອງໃຊ້ທົ່ວໄປ ເຊິ່ງມີນ້ຳໜັກປະມານ 180 ກິໂລກຼາມ, ຕໍ່ກັບກະເປົາຈຳນວນ 21 ໜ່ວຍນັ້ນ ທາງເຈົ້າໜ້າທີ່ໄດ້ກວດກາຈົດນັບ, ຕິດຕາຊັ່ງ ເຊິ່ງເປັນຢາເສບຕິດ ປະເພດຢາໄອສ໌ ຈຳນວນ 500 ຫໍ່, ລວມນ້ຳໜັກ 521 ກິໂລກຼາມ, ພ້ອມທັງອາຍັດຍົນ 1 ລໍາ ຍີ່ຫໍ້ ( LEAR JET ), ຖ້ຽວບິນ N73GP ( ເປັນຍົນສ່ວນຕົວ ) ແລະ ລົດກະບະຍີ່ຫໍ້ ນິດສັນ ສີຂາວ, ໝາຍເລກທະບຽນ ລວ 9799 ຫຼວງພະບາງ ຈໍານວນ 1 ຄັນ. ເມື່ອເປັນເເນວນັ້ນ ທາງເຈົ້າໜ້າທີ່ຈຶ່ງໄດ້ກັກຕົວນັກບິນ ຈໍານວນ 1 ຄົນ, ຜູ້ຊ່ວຍນັກບິນຈໍານວນ 1 ຄົນ ແລະ ນັກທ່ອງທ່ຽວ ຈໍານວນ 1 ຄົນ ເຊິ່ງເປັນຄົນຕ່າງປະເທດ, ພະນັກງານບໍລິສັດ ເອວີເອ ເຊີ້ນກຼາດ ຈໍານວນ 3 ຄົນ ຍິງ 1 ຄົນ (ສັນຊາດລາວ ) ແລະ ພະນັກງານສະໜາມບິນສາກົນແຂວງຫຼວງພະບາງ ຜູ້ຮັບຜິດຊອບເຄື່ອງເອັກສະເລ ຈໍານວນ 7 ຄົນ ຍິງ 2 ຄົນ ( ສັນຊາດລາວ ) ລວມທັງໝົດຈໍານວນ 13 ຄົນ ຍິງ 3 ຄົນ ພ້ອມທັງຢຶດຂອງກາງທີ່ກ່ຽວຂ້ອງເປັນຫຼັກຖານເພື່ອສືບຕໍ່ດໍາເນີນຄະດີຕໍ່. ສຳລັບລາຍຊື່ຜູ້ຖືກຫາຈຳນວນ 13 ຄົນທີ່ກ່າວມາຂ້າງເທິງນັ້ນ ທາງເຈົ້າໜ້າທີ່ຕຳຫຼວດ ໄດ້ສົມທົບເຈົ້າໜ້າທີ່ ແລະ ຂະເເໜງການທີ່ກ່ຽວຂ້ອງພວມສືບຕໍ່ດຳເນີນການສືບສວນ-ສອບສວນ ເຮັດໃຫ້ມີການຈະເເຈ້ງ ແລະ ດຳເນີນຕາມລະບຽບກົດໝາຍຕໍ່ໄປ. #ข่าวลาว #ข่าวประเทศลาว #ເວົ້າໃຫ້ຟັງ #SpillTheTea #ลาว #Laos #การเมืองลาว #สปปลาว #ประเทศลาว #ข่าวสปปลาว #LaoNews #Vaohaifung #เว้าให้ฟัง